Karl í BYMOS við afgreiðsluborðið. Hann býður upp á alla helstu smávöru til bygginga.

„Ég fylgist mjög vel með verðlagningu stóru búðanna og reyni að bjóða alltaf lægra verð. Svo gef ég tilboð í stórinnkaup.“
 
Þetta segir Karl D. Björnsson eigandi Byggingavöruverslunar Mosfellsbæjar eða BYMOS eins og hún er kölluð. Hann hefur starfrækt verslunina í fjögur og hálft ár og hún er staðsett í Háholti 14, á móti Krónunni og í sama húsi og Snæland og Draumakaffi.
 
Hvaða vörur ertu með í búðinni?
„Ég er með alla helstu smávöru. Málningu, kítti, lím, skrúfur og bolta, ljósaperur, verkfæri, lítil heimilistæki, rafmagnsvörur, garðvörur og svo framvegis. Ég er ekki með neina efnissölu fyrir utan málninguna en flest annað er hægt að nálgast hér og styttra að skjótast hingað heldur en í næstu byggingavöruverslun sem er í Grafarholti.“
 
Eru viðskiptavinirnir aðallega úr Mosfellsbæ?
„Já, flestir koma úr Mosfellsbæ, Kjalarnesi og Kjós. Þetta er allskonar fólk, verktakar, þeir sem er að byggja sér hús eða að dytta að heima hjá sér.“
 
Hvernig er opnunartíminn?
„Verslunin er opin mánudaga til föstudaga frá 10-18 og laugardaga frá 10-16.“